X
تبلیغات
رایتل

بالا شیریندی 


♦بیر قیزیم وار آتنا یاشدا

 چکیب آللاه قلم قاشدا

راضی دئییل بیرجه داشدا

ایاغیما ده یه واللاه

 

هر گون سحر خبر آلیر

♦آتا" آتنا "هارا لی دیر

اونوندا من تکی عشقی

آناسی لان آتاسی دیر


دئییرم کی منیم بالام

محببت مال دئییر آلام

هر کسه آجی اولسامدا

 سنه شیرین شکر بالام


اونوندا وار گول آناسی

محببتلی شیر آتاسی 

♦آتنادا هیچ راضی دئییل

آغلار قالا ائل طایفاسی


نئجه تقدیر من بیل میرم

نئچه گوندو من گول میرم

♦آتنالارین آتاسینین

 گوز یاشی حاخدی سیل میرم 


محمدعلی_حکمتی

فی البداهه ۹۶//۴//۲

سینه مده


یار ویران اوخ نه عزیزلنمه ده دی سینه مده

قورخورام گوز دئیه گیزلنمه ده دی سینه م ده


سانکی بیر قوش بالاسی آج یوواسیندا یالقیز

آج قالیب هر سسه سسلنمه ده دی سینه مده


هر زامان یار دیلیمه گلدی یارام دیللندی

نه ساغالدی نه ده اوزلنمه ده دی سینه مده


 بیر باخیشلان سینه مه تاخدی بیر اوخ جانانیم

او بیر اوخ  دردیله  یوزلنمه ده دی سینه مده


بیر یارین دردینی اکدیم لالا تک قوینومدا

مین گوزل دردی دریزلنمه ده دی سینه مده


دونیانین هر گوزلین گوزلریمه توش ائت دیم 

بیر آلا گوز کوزو کوزلنمه ده دی سینه مده


یار ویران یاره قانی آخدیقیجان جیسمیمده

سئوگینین دردی دنیزلنمه ده دی سینه مده


هئچ اوره گ آیریلا بیلمز کی اول عشقیندن

حکمتین عشقیده ایزلنمه ده دی سینه مده


بیست هشتم خرداد نودوشش

محمدعلی_حکمتی 

بیله سوار

بیر اوره گ گولدوره بیلمییه جکدیم

 نه یه گلدیم بو دونیایه نه یه من

اینسان اولوب درده دئیمییه جکدیم

نه یه گلدیم بو دونیایه نه یه من


سینیخ قلبی بیرده سیندیراجاغدیم

اینسان قیریب پیلله لر قوراجاغدیم

بالتا اولوب خول بوداغ قیراجاغدیم

نه یه گلدیم بو دونیایه نه یه من


چیبان اولوب گوز آلتدا چیخاجاغدیم

سئوگی لر دوهارین من ییخاجاغدیم

لیلی لر  یاندیریب من یاخاجاغدیم

نه یه گلدیم بو دونیایه نه یه من


موکافات خطرینه جان آلاجاغدیم

بوهتانی توللاییب قان سالاجاغدیم

گئجه لر شیطانلا من  قالاجاغدیم

نه یه گلدیم بو دونیایه نه یه من


آغ والیدین اولاجاغدیم دونیادا

قیزل گول تک سولاجاغدیم دونیادا

حاققین ساچین یولاجاغدیم دونیادا

نه یه گلدیم بو دونیایه نه یه من


نه خئییره یارادیم نه دکی شئره

هی بزک بزدیم دیشی یه نره

بوهتان سیز قویمادیم قالا بیردَره

نه یه گلدیم بو دونیایه نه یه من


حارام حالال قانمایاجاغدیمسا من

چیراغ اولوب یانمایاجاغدیمسا من

باختاورم سانمایاجاغدیمسا من

نه یه گلدیم بو دونیایه نه یه من


ایستینی سویوغو بیلمییه جکدیم

بیر یئتیم گوزنو  سیلمییه جکدیم

حکمت لر آغلادیب گولمییه جکدیم

نه یه گلدیم بو دونیایه نه یه من 


محمد علی حکمتی 

بیله سوار

هیجدهم خرداد سال نود و شش

تقدیم به ریش سفیدان شهر 

یاشادیم 

دان اولدوزو گئجه دردین نه اولدوغون یاشادیم

بویوک بیر آیریلیقین قلبه دولدوغون یاشادیم


او سروی قامتی دونیا ییخیب گئدن زامانی

صفالی باخچامیزین سروی سولدوغون یاشادیم


بیزیمده باخچامیزین تک گولون یولاندا خزان 

خاریندا گوزلرینین قانلا دولدوغون یاشادیم


باهارلی بیر سحرین واخلی پارلایان گونشی

چیخاندا آی بولود آلتدا بوغولدوغون یاشادیم


باهار چیچکلری سولدو پائییزلیق ائیله دیلر

پائییز باهار ساچینی هایلا یولدوغون یاشادیم


آغیر بیر آخشام آی اولدوز سنینله صوبح ائله دیم

بیر آیری دونیادا سروین دوغلودوغون یاشادیم


بو فانی دونیادا سعی ائت آدین قالیب یاشاسین 

بو دونیا وارلیغی بوردا سویولدوغون یاشادیم


دَرنده دونیا باغیندان گوزل او سرویلری

ایشیغلی دونیانی بیر گون توتولدوغون یاشادیم


آتا آنا باجی قارداش فراغینه نه ائدیم

بو فانی دونیادا حکمت یورولدوغون یاشادیم


هشتم خرداد ماه سال نودو شش

محمدعلی_حکمتی

آللاهین آدیلان..........

تقدیم به شورای منتخب بیله سوار جناب آقای یاور سجودی  و طرفداران عزیز 

پیروزی موبارک

اتحاف به سجودی عزیز


                 خالقین گوجو


ائل منه سس وئریب ائله باغلییام

سس وئره ن خالقیما من آدآغلییام

سئویرم خالقیمی خالقین اوغلییام

بیله سوار بالاسی بیله سوارلییام


ائلین وارلیغیننان دوران قوچاغام

ناخلف قولاغین کسن پیچاغام

عدالت عشقینده یانان چیراغام

ائل منه سس وئریب ائله باغلییام 

بیله سوار بالاسی بیله سوارلییام


وطن چشمه سینن جوشان سئل منم

ائلین سماسیندا اَسن یئل منم

آزریبایجانام اصیل ائل منم 

ائل منه سس وئریب ائله باغلییام

بیله سوار بالاسی بیله سوارلییام


او زرخیز دئییلن تورپاغدانام من

شرفلی شوهرتلی یایلاغدانام من

دوشمان ائیغین ازن چایلاغدانام من

ائل منه سس وئریب ائله باغلییام

بیله سوار بالاسی بیله سوارلییام


وطن سماسیندا اوچان قارتالام

ائلین شادلیغیندا یانان تونقالام

جاوان جاوان قوجالان آغ ساققالام

ائل منه سس وئریب ائله باغلییام

بیله سوار بالاسی بیله سوارلییام


گوزونو سئومیرسن خالقیما خور باخ

چیخاردیم گوزنو خالقینا کور باخ

خالقیمین گوجویم خالقیما دور باخ

ائل منه سس وئریب ائله باغلییام

بیله سوار بالاسی بیله سوارلییام


خالقیمین زحمتین وئرمه رم بادا

میللتین هیمئتین ساتمارام یادا

حکمتم هئله لیک خالقیم الویدا

ائل منه سس وئریب ائله باغلییام

بیله سوار بالاسی بیله سوارلییام


بیست و نهم اردیبهشت ۹۶

محمدعلی_حکمتی