X
تبلیغات
رایتل

آللاهین آدیلان
                     قارداش
                                  عیبرت

بیر هفته لیک آت دونیا مالین، داش قاشی قارداش
بایرام یئتیشیب ،یوخلا قوهوم قارداشی قارداش

ایللردی یئییرسن بالی یاغنان، گءجه گوندوز
بئش گونده باجی قارداشا وئر، سوتلی آشی قارداش

عومرون چاپیر آت ،سن سه قالیب سان دالا گریان
یازدیر آدینا بیر گیرانت ،باش داشی قارداش

دونیادن هاممی گئتمه لیدی یوخ بونا چاره
بیر بیر داشیییر، آغ قارا خوشگیل چاشی قارداش

آهن ده گئدیر ،میس ده گئدیر، آلمینییوم دا
اَلماس اولاراق قال، سن اوزوگلر قاشی قارداش

غم غوصه دن آیریل اوزونه بیر آباد ائو تیک
آباد ائوین آخیرده اولور پاداشی قارداش

دونیا مالینا هر گءجه گوندوز باشی ایدین
چاپدی سنی ،پول خطرینه هر بیرناشی قارداش

شئعریمده یازاندا او قیریق قارداشی قارداش
آه چکدی قلم ،یازماغا او اوباشی قارداش

قارداشدا اولوب چینی ماشینلار تکی گاه گیر
ضبطین آچیسان ،سو چیله ،ییر آبپاشی قارداش

قارداش باجینین حورمتی گئتدی او زامان کی
پیل اولدو باجی قارداشا گوز اویناشی قارداش

ایللردی گوزوم یولدادی قارداش گلر ایندی
نه گلدی، نه اولدو، منه بیر سیرداشی قارداش
 
دعوت ائله منده چیخاریم ،قارنیمی یاسدان
معده م تانیسین ،بیر گءجه لیک بوز باشی قارداش

یارب نه معممادی کی، قارداش قارا داشدی
وئرمیر هاوایی قارداشا بیر چومچه آشی قارداش

گل قارداشیم اول، بیرده قوراق کورسو اوجاقی
قالدی قورو یاندیردی بو دووران، یاشی قارداش

حکمت! جیبینه پول قویورام ،داغلاری سئیر ائت
بلکه ،سنی توخداتدی او داغ خاشخاشی قارداش

نوردهم اسفند ۹۵
محمد علی حکمتی

نظرات (0)
امکان ثبت نظر جدید برای این مطلب وجود ندارد.