X
تبلیغات
زولا

هارداسان

 

دوشموشم الدن ایاقدان گل نیگاریم هارداسان

بیر گونوم بیر ایل کئچیر گل نازلی یاریم هارداسان


گلمیر ایغیم جان دالیجان جاندا طاقت قالمییب

ترک ائدیر جان دونیاسین دار و نداریم هارداسان


سون بیر آرزوم تک سنی گورمکدی دونیاده گولوم

گل توکنسین گوزلریمدن اینتیظاریم هارداسان


قامتیندن دویمادیم دویماقدا اولماز سئوگیلیم

بو قیامت یا کی قامتدی چیناریم هارداسان


سن گئدن گوندن چیخان جان بیرده چیخماق ایستییر

گل دوباره آل بوجانی جان نیثاریم هارداسان


آلسادا دونیا الیمدن اوز قوماریله سنی

بیز ایکی روح بیرجه جاندا، جان جییاریم هارداسان


اول قدر جور و جفا ائتدی زمانه پیشمیشم

منده ایوب اولموشام صبر و قراریم هارداسان


سیم و زرله سن دئییشدین جننتی ماّوا میزی

من ایکی دونیایه وئرمم نوبهاریم هارداسان


سن منی ترک ائتدیگین گوندن ایتیب یوردوم یووام

گل منیم تک وارلیقیم گل گل  ویقاریم گل هارداسان


خوش گونوم سندن گئدیب آغلار کئچیر حکمت گونو

گل چیچک لنسین باغیم باخجام باهاریم هارداسان


دوم اردیبهشت ۹۶

محمدعلی_حکمتی 


نظرات (0)
امکان ثبت نظر جدید برای این مطلب وجود ندارد.