بو گئجه این شعر بخاطر مرگ نگهانی میرزاقا توحیدی

بو گئجه

درد و غم ایچره بوغولدیم بو گئجه

اوز ائویمده قوناغ اولدیم بو گئجه

سانکی دونیا منه اولموشدی قفس

نفسیم دوردی قارالدیم بو گئجه

صبحه دک یوز دف اویاندیم هَرَسان

تک و تنها جانا گلدیم بو گئجه

من بیلیردیم اوره گیم داشمالدی

دالغا تک سیلکلنیردیم بو گئجه

خوف لی بیر یوخو قورخوزدی منی

چوخ اوزون بیر یوخو گوردیم بو گئجه

هچ امید دن یوخیدی انتظاریم

چونکی دونیا ده تکیدیم بو گئجه

قورخودان کونجه سیخیلدیم یاتدیم

ائله بیل تازه دوغیلدیم بو گئجه

درد و غم نن یاخالاندیم بیلیرم

جسمی سیز روحیله قالدیم بو گئجه

اختیار سیز گئجه نی صبح ائله دیم

سانکی دریاده بوغولدیم بو گئجه

ناگهان یئر کوره سی رقص ائلدی

زلزله ی نن هده لندیم بو گئجه

زَهَرین توکدی فلک صبح منه

داشلار اوسته سَرَلندیم بو گئجه

اوره ییم یاندی آلیشدی سوندی

آیری دونیا یه آتیلدیم بوگئجه

نه بو دنیا نه جهنم نه بهشت

کُمادا چوخلی کسیلدیم بو گئجه

ساوالان تک باشیما قوندی دومان

حیف حکمت یارالاندیم بو گئجه

ناتمام قالمیشیدی سوزلریمیز

کوسیلی من آرالاندیم بو گئجه

هچ کسیم اولمادی بیر امداده

اوز ائویم ده قریب اُلدیم بو گئجه