هانکی  زاماندی

یوخسول ناچار قالیب بوره یین ساتیر

الهی بو زامان هانکی زاماندی
بالیغ دا دریادا بوغولور باتیر
الهی بو زامان هانکی زاماندی

میللتی گئتیریب زارا یالانچی
یوخسولا هی ویریب یارا یالانچی
باشدیکی هی چکیب دارا یالانچی
الهی بو زامان هانکی زاماندی

درد گوزومدن اوره گیمه ساللانیر
ناحاق ناحاق یاشیل باشلار داللانیر
بیر تیکه چوره گه یوخسول آللانیر
الهی بو زامان هانکی زاماندی

میللت ائدیر گئجه گوندوز حَرَکَت
داها یوخدو پولوموزدا بَرَکَت
نه شه هردی نه قصئبه نه ده کت
الهی بو زامان هانکی زاماندی

وار یوخوموز بوگون تالانماقدادی
قیز گلین هایاسی جالانماقدادی
درد قم اوستوموزه قالانماقدادی
الهی بو زامان هانکی زاماندی

تولکولر شیر اولوب قاراغالار قارتال
کنده ایت دارشیب شه هره چاققال
بیزی اوتوب کئچیب زامبیا سینگال
الهی بو زامان هانکی زاماندی

آغ گونه چیخمادوق قارادا ایتدی
دردی آختاریردوق چارادا ایتدی
حکمتین چایدان سارادا ایتدی
الهی بو زامان هانکی زاماندی


پنجم بهمن ماه  ۹۶
محمد علی حکمتی